______________

For comments and suggestions:

Email us at feedback@insidemindanao.com

or send us a message thru our MESSAGE TO THE EDITOR portion on our homepage

______________

Click here for Chronology of events
of the Manobo People in San Nicolas, Don Carlos, Bukidnon

First Posted on Inside Mindanao: September 25, 2007

Kalisod taliwala sa pinyahan
By Ronnie Tauna and Carlito Layagan

DON CARLOS, BUKIDNON—“Wala na mi pangkuhaan sa panginabuhian kay pinyahan naman ang palibot namo.”

Kini ang molo nga gipadangat ni Bae Nelie Egos, usa ka Manobo nga residente sa Purok 6, Barangay San Nicolas, Don Carlos, Bukidnon.

Sumala kang Bae Egos, ang gilapdon nga 21 hektarya nga giapod-apod sa gobyerno sa 358 ka pamilya nga miyembro usab sa grupong gitawag nga Nagkahiusang Tingog sa mga Manobong Mag-uuma sa Molita Association (NAGTIMMA) dili igo.

Ingon ni Bae Egos, ang major nga problema nila mao ang:
1. Pagkaon sa inadlaw-adlaw;
2. Panamit tungod kay walay igong ikasuporta kay walay trabaho; ug
3. Tuition Fee sa ilang mga anak nga nagtungha.

Sumala kang Datu Nestor Lantong, tribal leader sa NAGTIMMA, ang yuta nga gitamnan karon sa pinya sa Davao Agricultural Ventures Corp. (DAVCO) pinag-iyahan sa ilang mga katigulangan.

Ingon ni Datu Lantong, gipahulman lamang kini nga yuta sa ilang katigulangan; apan gipatituluhan kini nga yuta sa naghulam ug napasa-pasa na dayon.

“Dili na maihap ang kasakit ug kapait nga among natagamtaman sa unang panahon. Ikapila gi-demolish and among kabalayan ug kaumahan. Dili mi makabalhin sa laing lugar kay wala miy kabalhinan,” ingon pa ni Datu Lantong.

Dugang pa ni Datu Lantong, suwerte na ang makakaon ug ikatulo sa usa ka adlaw, kasagaraan makakaon maka-usa o duha ra.

Ingon usab ni Bae Lily Macapaar, dili sila dawaton nga motarbaho sa pinyahan sa DAVCO tungod ang dawaton lamang sa kompaniya sa DAVCO mao lamang katong naay Certificate of Land Ownership Award (CLOA)—usa ka dokyumento nga gikan sa Department of Agriculture (DAR) nga nagpamatuod nga sila ang tag-iya sa yuta nga gitamnan sa pinya sa DAVCO.

Basi sa pakighinabi kang Datu Eugenio Egos, nagahangyo siya nga unta hatagan ug pagtagad sa mga ahensiya sa gobyerno ang problema nila sa ilang lugar.

Ang grupo sa NAGTIMMA nanghinaut nga mahatag kanila pinaagi sa collective CLOA ang 1,500 hectares para kini sa 358 ka pamilya sa NAGTIMMA sa Purok 6, Barangay San Nicolas, Don Carlos Bukidnon.

With reports from Ellen Red

END

BACK