Photo by Ellen Red

CORTES, SURIGAO DEL SUR—Mga 800 kapin ka lumulopyo sa Barangay Burgos ang mipirma sa petition nga naghangyo sa mga opisyales sa gobyerno sa dili pag–approve sa mining operation sa Burgos.

Parte sa maong petition nagkanayon, "Kami supak gayud nga adunay mo–operate ug mina dinhi sa Burgos. Balikon namo ang among kasingkasing hangyu sa mga opisyales nga may gahum sa dili paghatag sa permit sa mina dinhi sa Burgos arun walay kadautan nga modangat dinhi ning among malinawong dapit."

Niadtong Mayo 25, 2008, sa Barangay Burgos, Cortes, Surigao del Sur adunay nahitabong prosisyon batok sa pagahimoong mina sa Barangay Burgos. Ang nasangpit na prosisyon gitambungan sa mga katawhang lumad sa lugar, ang Manobo–Mamanwa, mga dayo, parishioners sa St. Cruz Chapel, Burgos, Cortes, Surigao del Sur, ug tarbahante sa mga non–government organizations.

Sa pakighinabi kang Fr. Glenn Melo, parish priest sa St. Cruz Chapel, siya nagkanayon, "Usa gayud ako nga hugot mobabag (proposed mining operation in Burgos) tungod kay usa kini nga dako ug kadaut sa atong kinaiyahan. Unsaun pa man pagpananom ug pagpangisda sa mga katawhan kung ang kinaiyahan madaut na?"

Kasagaran sa mga lumulopyo sa Burgos mga mag–uuma ug mangingisda.

Basi sa Barangay Burgos Resolution # 4, series of 2008, gi–endorse sa majority sa mga barangay kagawad ang proposed small–scale mining, specifically for copper and gold, ni Galden L. Galila "within the area of Barangay Burgos, Cortes Suirgao del Sur." Kining maong resolution gi–aprobahan miadto pang March 3, 2008.

Sa pakighinabi kang Castro Cubero, Barangay Chairman of Burgos, siya nagkanayon, "Dugay pa man na siya (mining permit) ma–approve tungod kay daghan pa kana nga proseso ang agihan."

Sa pakighinabi kang Linda Banaag, dili niya tinuod nga pangalan, usa sa nagpakabanang tribu sa Barangay Burgos, matud pa niya ang mga tribu sa komonidad sa Burgos nabahin. Ang uban uyon na sa small–scale mining tungod kay ang uban nabayran na, ingon ni Linda.

Ang gi-propose nga small–scale mining area sulod kini sa ancestral domain claim sa Kahugpongan sa Tribung Mamanwa–Manobo sa Lanuza, Cortes ug Tandag (KATRIMMA LACORTAN).

Matud pa ni Engr. Roel C. Caseñas Jr., project coordinator sa Green Mindanao Association ug usa sa mitambong sa May 25 prosisyon batok sa mina sa Burgos, "Kami nagatoo nga kung ang kinaiyahan na ang manukot tungod sa kadaut nga gihimo, dili lang kay usa ra ka tao ang iyang pagasingilon, kon dili ang kinatibok-an sa maong apektadong lugar."

END

BACK