IPIL, ZAMBOANGA SIBUGAY—Ang probinsiya sa Zamboanga Sibugay adunay duha ka bay, ang Domaquelas Bay ug Sibuguey Bay.

Abunda ang Domaquelas Bay ug Sibuguey Bay sa nagkalain–laing klase sa isda sa bato, sa kalapukan, ug sa katunggan.

Dinhi, 40,000 kon kulang ka mga gaymay nga mangingisda ang nanginabuhian—gikan sa pagpangisda sa lawod paingon sa pagpanginhas.

Tungod sa kadaghan sa mga isda ug kadako sa palaisdaan nadani ang mga commercial nga mangingisda nga mangisda niining lugara. Kasagaraan sa commercial nga mangingisda gikan sa laing lugar sama sa Manila ug Zamboanga City ug gipanag–iyahan kini sa mga dagkong magpatigayon ug mga tawo nga naay position sa gobyerno.

Kining commercial nga mangingisda naggamit ug destructive nga pamaagi sa pangisda sama sa higanting suga ug baby trawl.

Sumala sa mga gagmay nga mangingisda, sukad sa pagsulod sa mga commercial nga mangingisda, 70% ang nawala sa ilang mga income tungod kay nagkagamay ang mga isda. Ingon nila gamay na lang ang ilang makuha nga isda resulta sa destructive nga pangisda.

Tungod niani nga sitwasyon, niadtong Mayo 21, 2007, ang Social Action Ministry sa Prelatura sa Ipil, nagpatawag ug panagtigum. Kini nga tigum gitambungan sa mga representanti sa local government units, law enforcers, Bureau of Fisheries and Aquatic Resources (BFAR), ug mga mangingisda.

Niadtong nasangpit nga meeting, gi–presentar sa gaymay nga mga mangingisda ang ilang sitwasyon, ilang problema: pagminos sa ilang kita tungod sa paggamit sa destructive nga pangisda. Dugang pa nila ang mga pirata ga–extort ug kuarta kanila.

Human sa pagpadayag sa mga gagmay nga mangingisda sa ilang sitwasyon, tubag sa representanti sa local government units nga adunay mga balaod ug ordinansa apan kulang ug ngipon labina sa pagpatuman niini. Gika–ingon nga adunay national nga balaod, ang Fisheries Code, apan basi sa balaod kinahanglan pa kini adaptahon sa municipyo ug sa probinsiya.

Sa nasangpit nga panagtigom, nakahimo ug recomendasyon nga ang probinsiyal legislative body, uban sa legislative bodies sa munisipyo makahimo ug unified nga ordinansiya, para adunay ngipon ang national law, ang Fisheries Code. Gidawat kini sa mga representanti sa local government units gikan sa probinsiya ug munisipyo.

Niadtong October 15, 2007, ang local government units sa probinsiya sa Sibugay nagpatawag ug konsultasyon sa mga mangingisda ug mga representanti sa mga munisipyo. Dinhi nakahimo ug draft unified ordinance.

Sa November–December 2007, gipahigayon ang public hearings sa matag munisipyo nga naay baybayon.

Niadtong Enero 2008, gi–aprobahan sa probinsiyal board ang provincial unified ordinance nga nagtumong sa pag–undang sa destructive fishing sa probinsiya sa Zamboanga Sibugay.

END

BACK