SURIGAO DEL SUR—Sugod na gayod ang mina sa Carrascal, Surigao del Sur.

Gikaingon ni Surigao del Sur Governor Vicente "BB" Pimentel nga maayo gayod nga dunay mina aron mahaw–as sa kalisod ang probinsiya. Ang walay trabaho maka–benepisyo niining mina, ingon pa ni gobernor.

Karon nga naa nay mina, daghan ang mulo sa katawhan. Daghan na ang nagbasol nga dunay mina kay lagi wala makatarbaho.

Bisan pa man gani kadtong nakatarbaho nagbasol tungod kay anaa ra sa ilang tugkaran ang epekto sa mina: abog (panahon sa init), lapok (panahon sa ulan).

Usa ka tarbahante sa mina nga akong nahinabi ang nagmulo kay sulod lang sa lima ka bulan ang ilang tarbaho sa mina undang na sab. Ang ilang suhol nga P226 kada adlaw aduna pa gyuy daghang kaltas.

Wala nay isda nga makuha ang mga mananagat kay lubog na ang dagat ug lapok. Usa ka mamokotay ang nag–reklamo tungod kay sa iyang pagpamokot ang nadala puro na lapok. Ang kabakhawan o mangroves nga maoy itloganan sa mga isda gitambakan ug yuta—epekto sa mina.

Nag–ingon pud ang usa ka tag–iya sa kan–anan nga nahimutang sa Barangay Bon–ot, lungsod sa Carrascal nga moabot na ang abog sa ilang dapit. Naguol siya kay sa ngadto–ngadto wala nay moka–on sa ilang restaurant.

Ang grupong gitawag "CAHAYAG" kon Carrascalanon Hiniusang Aksiyon alang sa Yutang Gilauman ang nagbuhat ug lakang panawagan aron mapaabot kang Presidente Gloria Macapagal–Arroyo ang mga mulo sa katawhan nga ihunong ang mina sa Carrascal kay dako ang kadaot nga mahimo niini labi na sa dagat, kaumahan, ug watershed area.

END

BACK

Related Articles:
Climate change in Carrascal, Surigao del Sur
Iron Mountain moving to their village